قريبا من موت

.....
من 12 سنه بالتقريب كنت بدرس وبشتغل عشان اصرف علي نفسي .
ولاني مش من القاهرة كنت ساكن في سكن طلبه بنظام الغرف , يعني الشقه بتكون 3 غرف كل غرفه بتتاجر منفصله
العماره اللي روحت اسكن فيها كانت 6 ادوار .
الدور الاول ساكن فيه صاحب البيت راجل كبير موجه في التربيه والتعليم
وبقيت الادوار لحد الدور الخامس كلهم ساكنين طلبة
الا الدور السادس !!!
وده اللي كنت هسكن فيه
روحت انا وصاحبي عشان نأجر اوضه ليا اسكن فيها وروحنا لصاحب البيت وطلعنا مع صاحب البيت الدور السادس عشان يوريني هسكن فين
الشقه كانت مفتوحة ومش مقفولة وابواب ال 3 غرف مفتوحين
صاحب البيت قالي اختار الاوضه اللي تعجبك واقعد فيها واشتري قفل حطه علي باب اوضتك قولت ماشي
عجبتني اوضه منهم قولت هقعد في دي بس العفش اللي فيها كان مش اد كده
قررت انقل من الاوض التانيه اللي في نفس الشقه المرتبه الكويسه والسرير الكويس احطهم عندي في اوضتي واحط مكانهم الحاجه اللي مش عجباني
طبعا الاوض كانت مفروشه فرش علي الاد يادوب سرير ودولاب صغير .
المهم نقلت الفرش ونزلت اشتريت قفل وحطيت القفل علي الاوضه
ونزلت روحت لواحد صاحبي وهو عارف اني بموت في الملوخيه ووالدته كانت عزماني علي ملوخيه وفضلت معاه لحد ما الساعه بقت 10 بليل
ورجعت علي السكن الجديد انام عشان عندي شغل الساعه 7 الصبح
فتحت الاوضه واتفاجات ان كل حاجه رجعت زي ما كانت الفرش النضيف اللي نقلته لاوضتي مش موجود ورجع الفرش اللي كان فيها تاني
طب ازاي حصل
القفل مفتاحه معايا انا بس وماديتش لحد مفتاحه
اكيد صاحب البيت اللي عمل كده ده اللي جه في دماغي وقتها
الساعه كانت 11 ونص وكنت هموت من التعب قولت انام وبكره يحلها الف حلال
وقمت تاني يوم روحت شغلي في الكافي اللي كنت شغال فيه وقتها وحكيت لصاحبي علي اللي حصلي قالي ده صاحب البيت يامعلم بيشتغلك
خلصت شغل وروحت وخبطت علي صاحب البيت قولتله علي اللي حصل وماجاليش جراءه اقوله انت اللي عملت كده لانه راجل كبير وكده وكان رده والله يابني ماعرف انت بتتكلم عن ايه تلاقيك كان بيتهيئلك
علي العموم الفرش اللي يعجبك حطه عندك واللي مش عاجبك انقله الاوض التانيه المهم اتضطريت اسكت
وقولتله ماشي بس علي الله مايتكررش اللي حصل تاني وارجع الاقي كل حاجه زي ما كانت
ابتسم وقالي لا ماتخافش .
وطلعت قولت اريح شوية , ونمت
باب الاوضه من جوه ليه ترباس بس ترباس قديم وكبير الحجم وبيعمل صوت مزعج وهو بيقفل وهو بيفتح
المهم نمت وحسيت بسقعه بعد مانمت بنص ساعه
ببص السقعه جايه منين لاقيت باب الاوضه مفتوح عليا وجايب برد شديد جدا وانا متاكد اني قفلت الباب عليا بالترباس
استغفرت ربنا وقمت قفلت الباب عليا تاني وجيت انام وافتكرت ان الترباس صوته وحش ازاي ماسمعتوش وهو بيتفتح
قريت ايه الكرسي ونمت خايف
واتكررت تاني نفس الحركه !!! بس بعدها بساعتين تلاته .... وحكيت لصاحبي تاني يوم قالي مش عارف اقولك ايه شغل قران قبل ماتنزل قولت ماشي هشغل قران مش هخسر شئ
بقيت اشغل القران قبل مانزل وخلاص ما بقاش في حاجه ونسيت الموضوع وعدا 3 ايام ومافيش اي شئ
ونزلت اشتريت شوية حاجات قولت احطهم في البيت للعشاء
عشان كنت بروح جعان وما بيبقاش في اكل وبكسل انزل تاني وانام من غير اكل
المهم جيبت تونه وجبنه مسلسلات واشتريت نص فرخه مشوية وطلعت البيت ولسه هاكل ........ باب الاوضه خبط فتحت لاقيت صاحبي
ولسه بقوله حماتك بتحبك قالي لا انسي الاكل ده خالص وقوم معايا امي عامله ملوخيه باللجمبري ومحلفاني مارجعش من غيرك
قولتله الاكل هيبوظ ومافيش تلاجه
قالي ياعم الجو سقعه مش هيبوظ قوم تعالي وبات معايا النهارده ولا عايز امي تزعل منك قولتله حاضر وروحت معاه
المهم بعد ماروحت معاه وبتت معاه اليوم ده روحت علي شغلي تاني يوم ورجعت علي بيتي عادي
رجعت واتصدمت صدمة عمري من اللي شوفته !!
الفراخ انا سايبها متغطيه بورق جرايد لاقيتها متاكله ومش بني ادم اللي واكلها
طريقه اكلها كان وحش اللي واكلها لدرجة ان العضم متاكل نصه والبواقي من العضم واضح عليها ان وحش اللي واكلها مش بني ادم والله
الجبنه مش مفتوحه بطريقه بني ادم لا ده ورق المسلسلات كأن الجبنه مشفووطه من الورق اتمني اكون عارف اوصلك الصورة
بالنسبه بقي للتونه كانت قصه تانيه خالص
علبه التونه مش مفتوحه لا . دي منبوشه بالايد ومافيش فيها اي شئ
علبه التونه يا استاذ احمد فيها 4 فتحات كانهم صوابع ممدودين فيها والعلبه فاضيه من جوه تماما حتي المفروض يبقي في بقايا زيت التونه او كده او حتي فتات
العلبه نضيفه تماما كانها مغسولة وماتحطش فيها تونه من اساسه كل اللي فيها 4 اخرام كانهم صوابع مخترقين الغطا لميت البقايا دي كلها ونزلت بيهم لصاحب البيت قولتله فهمني ايه ده ومين عمل كده
ومين فتح اوضتي في غيابي ووصلت لسرقه الاكل ؟ ده حرامي معفن اوي
اكيد انت عارف مين بيعمل ده
اكيد حد من اللي ساكنين عندك
اديني فلوسي ياعم وانا همشي واشوف سكن تاني . اعتبرني سكنت نص شهر وخد تمنه واديني النص الشهر التاني
الراجل هداني ووعدني ان ده مش هيتكرر تاني واقسم بالله انه مايعرفش مين بيعمل كده
كل اللي قاله انه هيغير كالون الشقه عشان ماحدش يعرف يدخل الشقه من اساسه
المهم نزلت خرجت علي الكورنيش شوية ورجعت علي 10 بليل نمت من التعب
وكالعادة صحيت بسبب السقعه
بس المره دي الباب ماتفتحش لا الغطا لاقيته مرمي علي الارض . وانا مش برمي الغطا وانا نايم كدبت نفسي وجيبت الغطا واتغطيت ونمت
كانت الساعه بقت حوالي 2 او 2 ونص
ونمت ... وعلي الساعه 4 حسيت بالغطا بيتشد من عليا ابتديت انتبه للي بيحصل
ومسكت في الغطا ! بس انا واثق ان الغطا اتشد وغطيت وشي وانا هموت من الرعب
واتشد الغطا تاني وبصيت علي مين بيشد الغطا وكنت اتمني ماشوفش المنظر ده
ولاقيت منظر واحد شاب في العشرينات واقف بس في وشه غضب ومرعب جدا جدا جدااااااااااا
وعينه مش زيي وزيك
عيونه مسحوبة بالطول مش بالعرض فاهم اقصد ايه ؟!؟!؟
لا بقيت عارف اتكلم ولا انطق وبقول يارب يغمي عليا او اطلع بهلوس مش عايز اصدق اللي شايفه
كل اللي قولته ونبي سيبني بالله عليك ما تازيني
ابتدي يقرب مني وكأن االشمس ابتدت تقرب مني كل ما بيقرب بحس بلهيب وحر شديد واختفي فجاءة
خدت البطانيه اللي كنت متغطي بيها ونزلت الشارع وفضلت ماشي مش عارف رايح فين كل اللي بعمله بعيط ومنهار من العياط
لحد ما رجلي وصلتني علي كورنيش شبرا لانه كان قريب من السكن
وفضلت قاعد علي كرسي من كراسي الاستراحات اللي هناك
ومن التعب نمت
وقمت علي ايد بتصحيني وصوت بيقولي اصحي ياعم انت هتعمل فيها قتيل فوقت ولاقيته امين شرطه
ومعاه بقيت زملاته انا اول ماشوفتهم عيطت تاني وانهارت في العياط
في اللي كان بيقول عليا منهم بمثل
المشكله انا سامع كل شئ ومش عارف ارد وكل ما حد كان يحاول يهديني تصعب عليا نفسي وانهار اكتر
كان معاهم ظابط قمه في الزوق جابلي عصير
وهداني وقالي احكيلي في ايه وايه مقعدك كده ومعاك بطاقه ولا لا المهم حكيتلو
وقولتلو اللي حصل بالظبط .
ماصدقش
وامين منهم قال انت هتشتغلنا يا روح امك الظابط وبخه وقالي كلمتين
اسمع انا حاسس انك ابن ناس بس كلامك ما يدخلش دماغ حد انا هاخدك ونروح البيت اللي انت ساكن فيه
بس لو طلع كلامك كدب ولا حوار وديني ما هوريك الاسفلت تاني
قولتله موافق تعالي معايا وروحنا انا وهو والامناء اللي معاه وطلعنا علي الشقه فوق ووريتهم كل شئ ولحسن الحظ علب التونه كانت موجوده لسه وبقايا ورق الجبنه ومجرد ما شافو الحاجه انا شوفت في عيونهم نظرة رعب غريبه وابتدي منهم ناس يستعيزو بالله
وفي منهم اللي رجع لورا وخرج بره باب الشقه خالص
الظابط قالي وريني صاحب البيت ابن ال ..................... ونزلنا للدور الاول لصاحب البيت وفضل يخبط عليه هو واللي معاه بطريقه غبيه لحد مافتحلنا ودخلنا
الظابط اول ما الراجل فتح قاله بقولك ايه انت راجل كبير ومش عايز ابهدلك احتراما لسنك بدون لف ودوران وحورات
الدور السادس في ايه وايه اللي بيحصل
قالو هو حصل ايه يا باشا بس
قالو شكلك راجل مش تمام وبتحب اللف والدوران ماتنطق يا راجل يا ...... في ايه فوق في الشقه
قالو هقولك يا بيه بس مالوش لزوم الاهانات وكده
من سنه او حوالي 10 شهور كان في ولدين هنا ساكنين واتخانقو مع بعض وواحد منهم خنق التاني بالحزام
وفضلنا قافلين الشقه 8 شهور القران ما بيتقطعش منها وجيبنا شيخ وقال انه خلاص الشقه نضيفه ومافيهاش شئ وسكنتها لواحد قبليه
وفضل 5 ايام ومشي ماعرفش راح فين حتي حاجته ماخدهاش وماجاش في دماغي انها يكون مسكونه او فيها حاجه
انا قولت خلاص ملفيش في الشقه شئ والله ماعرف يابيه انها فيها شئ
وبس وسيبت السكن طبعا ومن ساعتها وانا خلاص تقدر تقول قلبي مات بقيت مؤهل لاني اشوف اي شئ
انا نفسي ماعرفش الجراءه دي جاتلي منين اتغيرت ودي قصتي

......